ye KHayal aata hai tanhai mein aksar mujhko

ye ḳhayāl aatā hai tanhā.ī meñ aksar mujh ko

jī rahā hogā vo kis tarh bhulā kar mujh ko

tere kūche kī sukūnat ho mayassar mujh ko

log baiThā huā dekheñ tire dar par mujh ko

un ke hamrāh maiñ jā.ūñ bhī to kaise jā.ūñ

sab nazar aate haiñ yūsuf ke barādar mujh ko

Thokareñ khā ke sañbhalne kā hunar aaya hai

kyoñ na mahbūb hoñ phir raah ke patthar mujh ko

tang-dastī thī magar log kushāda-dil the

yaad aate haiñ vo TuuTe hue chhappar mujh ko

is liye maiñ kabhī ġhāfil nahīñ hone paatā

vaqt rah rah ke lagā detā hai Thokar mujh ko

us kī rahmat hai ziyāda ki ḳhatā.eñ merī

mat dikhāo mire ā'māl kā daftar mujh ko

maiñ na so.uuñ to use niiñd kahāñ aatī hai

merī maañ sotī hai har roz sulā kar mujh ko

is liye dekh ke dushman ko akaḌ jaatā huuñ

inkisārī se samajh le na vo kamtar mujh ko

yuuñ na ho DhūñDnī paḌ jaa.e tujhe rāh-e-farār

chheḌnā bhaa.ī mire soch samajh kar mujh ko

apnī nazroñ meñ maiñ kuchh aur bhī ghaT jaatā huuñ

pesh kartā hai koī jab bhī baḌhā kar mujh ko

ho gayā aur shab-e-hijr kā kaTnā mushkil

chhup gayā chāñd tirī yaad dilā kar mujh ko

ai junūñ kaun sī manzil hai ye batlā to sahī

āsmāñ bhī nazar aatā hai zamīñ par mujh ko

ai 'shakīl' un kī galī hai tirī jāgīr nahīñ

kis liye Toktā rahtā hai tū aksar mujh ko

ye KHayal aata hai tanhai mein aksar mujh ko

ji raha hoga wo kis tarh bhula kar mujh ko

tere kuche ki sukunat ho mayassar mujh ko

log baiTha hua dekhen tere dar par mujh ko

un ke hamrah main jaun bhi to kaise jaun

sab nazar aate hain yusuf ke baradar mujh ko

Thokaren kha ke sanbhalne ka hunar aaya hai

kyon na mahbub hon phir rah ke patthar mujh ko

tang-dasti thi magar log kushada-dil the

yaad aate hain wo TuTe hue chhappar mujh ko

is liye main kabhi ghafil nahin hone pata

waqt rah rah ke laga deta hai Thokar mujh ko

us ki rahmat hai ziyaada ki KHataen meri

mat dikhao mere aa'mal ka daftar mujh ko

main na soun to use nind kahan aati hai

meri man soti hai har roz sula kar mujh ko

is liye dekh ke dushman ko akaD jata hun

inkisari se samajh le na wo kamtar mujh ko

yun na ho DhunDni paD jae tujhe rah-e-farar

chheDna bhai mere soch samajh kar mujh ko

apni nazron mein main kuchh aur bhi ghaT jata hun

pesh karta hai koi jab bhi baDha kar mujh ko

ho gaya aur shab-e-hijr ka kaTna mushkil

chhup gaya chand teri yaad dila kar mujh ko

ai junun kaun si manzil hai ye batla to sahi

aasman bhi nazar aata hai zamin par mujh ko

ai 'shakil' un ki gali hai teri jagir nahin

kis liye Tokta rahta hai tu aksar mujh ko