ye KHwab jis ne dikhae the ek safar ke mujhe

ye ḳhvāb jis ne dikhā.e the ik safar ke mujhe

vo ashk de gayā āñkhoñ meñ umr bhar ke mujhe

hai fan meñ yaktā vo sayyād ho ki ho dilbar

uḌaan bharne ko kahtā hai par katar ke mujhe

kaThin thā rāsta dushvār thī har ik manzil

koī dikhā.e usī raah se guzar ke mujhe

maiñ us kī ḳhaas nazar se taḌap taḌap uTThūñ

vo itne pyaar se dekhe Thahar Thahar ke mujhe

zarā sī der Thaharne de ai ġham-e-duniyā

zarā sā dekh le vo bhī to aañkh bhar ke mujhe

mire ḳhayāl kī uljhan kahāñ sudhartī hai

gul-e-bahār ne dekhā hai phir sañvar ke mujhe

sulag rahī huuñ maiñ sāñsoñ kī tez bhaTTī meñ

pilā rahā hai vo ulfat ke jaam bhar ke mujhe

vo shahd ghol rahā hai samā.atoñ meñ mirī

bulā rahā hai koī baam se utar ke mujhe

dhaḌak rahā hai mohabbat meñ dil mirā 'afroz'

guzar rahī haiñ havā.eñ bhī pyaar kar ke mujhe

ye KHwab jis ne dikhae the ek safar ke mujhe

wo ashk de gaya aankhon mein umr bhar ke mujhe

hai fan mein yakta wo sayyaad ho ki ho dilbar

uDan bharne ko kahta hai par katar ke mujhe

kaThin tha rasta dushwar thi har ek manzil

koi dikhae usi rah se guzar ke mujhe

main us ki KHas nazar se taDap taDap uTThun

wo itne pyar se dekhe Thahar Thahar ke mujhe

zara si der Thaharne de ai gham-e-duniya

zara sa dekh le wo bhi to aankh bhar ke mujhe

mere KHayal ki uljhan kahan sudharti hai

gul-e-bahaar ne dekha hai phir sanwar ke mujhe

sulag rahi hun main sanson ki tez bhaTTi mein

pila raha hai wo ulfat ke jam bhar ke mujhe

wo shahd ghol raha hai samaaton mein meri

bula raha hai koi baam se utar ke mujhe

dhaDak raha hai mohabbat mein dil mera 'afroz'

guzar rahi hain hawaen bhi pyar kar ke mujhe