یہ کس کے خیال نازک سے ذہنوں کا دریچہ روشن ہے

یہ کس کے خیال نازک سے ذہنوں کا دریچہ روشن ہے

یہ کس کے عکس تبسم سے آباد دلوں کا درپن ہے

احساس کے غنچے کھلتے ہیں یادوں کی حسیں پروائی سے

ہر شب کے شگفتہ پہلو میں خوابوں کا مہکتا گلشن ہے

اک حسن مجسم کا جب سے آنکھوں نے سراپا چوما ہے

کچھ ہوش نہیں مدہوش ہوئے کچھ عقل و خرد سے ان بن ہے

یہ رنگ چمن یہ بزم سخن یہ عالم مستی رقص و طرب

ہم جام و سبو کو چھلکائیں جب رات کا رنگیں دامن ہے

اس محفل خوباں کا مے کش کیا رنگ و سماں ہے مت پوچھو

الفاظ کی زریں بارش ہے نغمات کی ہر سو چھن چھن ہے