ye kis ke naqsh aaine mein ubhre ye kaun rahat hai jhilmilai

ye kis ke naqsh aa.ine meñ ubhre ye kaun rāhat hai jhilmilā.ī

ki us kā jaadū junūñ meñ ghulte huoñ ko behāl kar gayā hai

hamāre hisse meñ laao de do tamām vahshat vo sab aziyyat

tumhāre hāthoñ meñ jo thamā kar koī na jaane kidhar gayā hai

tumheñ kisī zaḳhm kī ḳhabar tak na deñge ham ki azīz-e-jāñ ho

na ye batā.eñge sukh kā dariyā tabāh kar ke utar gayā hai

hamārī hālat kā kyā Thikāna ki dil se baḌh kar thā ġham tumhārā

magar ai mahtāb husn terā batā ki kaise bikhar gayā hai

shumār tāroñ kā mat karo tum gino nahīñ ab ye bahte aañsū

jo dard thā ab vo miT chukā hai jo zaḳhm thā ab vo bhar gayā hai

vo ek hasrat jo dil ke andar ḳhudā banī thī nahīñ rahī hai

vo sabr thā jo ġhurūr-e-hastī qasam ḳhudā kī vo mar gayā hai

ye kis ke naqsh aaine mein ubhre ye kaun rahat hai jhilmilai

ki us ka jadu junun mein ghulte huon ko behaal kar gaya hai

hamare hisse mein lao de do tamam wahshat wo sab aziyyat

tumhaare hathon mein jo thama kar koi na jaane kidhar gaya hai

tumhein kisi zaKHm ki KHabar tak na denge hum ki aziz-e-jaan ho

na ye bataenge sukh ka dariya tabah kar ke utar gaya hai

hamari haalat ka kya Thikana ki dil se baDh kar tha gham tumhaara

magar ai mahtab husn tera bata ki kaise bikhar gaya hai

shumar taron ka mat karo tum gino nahin ab ye bahte aansu

jo dard tha ab wo miT chuka hai jo zaKHm tha ab wo bhar gaya hai

wo ek hasrat jo dil ke andar KHuda bani thi nahin rahi hai

wo sabr tha jo ghurur-e-hasti qasam KHuda ki wo mar gaya hai