ye kis ke soz ka hai bazm-e-jaan mein intizar ai dil

ye kis ke soz kā hai bazm-e-jāñ meñ intizār ai dil

ki aaheñ aaj sū-e-ālam-e-bālā nahīñ jātīñ

umīdeñ jab mirī baḌh aa.iiñ to hañs kar lage kahne

ye barsoñ qaid dil meñ rah ke kyuuñ ghabrā nahīñ jātīñ

nahīñ gustāḳh ā.īna muqābil hai khaḌā koī

ye hairāñ hai ki kyuuñ āñkheñ tirī sharmā nahīñ jātīñ

khaḌā huuñ intizār-e-yār meñ juuñ shāḳh-e-nargis maiñ

mujhe hairat hai kyuuñ āñkheñ mirī pathrā nahīñ jātīñ

tire gulshan meñ tāroñ kī bahār ik hai ajab jaadū

ye kaliyāñ phuul ban kar ai falak kumhlā nahīñ jātīñ

'humāyūñ' terā dil bhī gulshan-e-hasrat kā naġhma hai

ḳhushī meñ bhī tirī bāteñ vo ġham-afzā nahīñ jātīñ

ye kis ke soz ka hai bazm-e-jaan mein intizar ai dil

ki aahen aaj su-e-alam-e-baala nahin jatin

umiden jab meri baDh aain to hans kar lage kahne

ye barson qaid dil mein rah ke kyun ghabra nahin jatin

nahin gustaKH aaina muqabil hai khaDa koi

ye hairan hai ki kyun aankhen teri sharma nahin jatin

khaDa hun intizar-e-yar mein jun shaKH-e-nargis main

mujhe hairat hai kyun aankhen meri pathra nahin jatin

tere gulshan mein taron ki bahaar ek hai ajab jadu

ye kaliyan phul ban kar ai falak kumhla nahin jatin

'humayun' tera dil bhi gulshan-e-hasrat ka naghma hai

KHushi mein bhi teri baaten wo gham-afza nahin jatin