یہ کس خیال کی موجودگی ستاتی ہے

یہ کس خیال کی موجودگی ستاتی ہے

مرے وجود میں اک شام ڈھلتی جاتی ہے

یہ رہگزر جو تری سمت لے کے جاتی ہے

اسی کے بیچ کہیں گمرہی بھی آتی ہے

ہمیشہ دیر سے کھلتا ہے کیوں زمانے پر

وہ راستہ جسے آوارگی بناتی ہے

کسے تمیز جو رنگوں کو چکھ کے بتلائے

یہ آنکھ ہے جو سبھی ذائقے بتاتی ہے

وہ رو پڑے تو شجر اس کے ساتھ روتے ہیں

وہ ہنس پڑے تو صبا تالیاں بجاتی ہے

اسی سے دشت کی آب و ہوا سلامت ہے

وہ اک ادا جو ترے وحشیوں کو آتی ہے