ye kis ko aaya KHayal mera ye main kise yaad aa raha hun

ye kis ko aaya ḳhayāl merā ye maiñ kise yaad aa rahā huuñ

jigar kī be-tābiyoñ meñ kuchh kuchh sukūn sā aaj pā rahā huuñ

ye māh-o-anjum ye nuqra.ī shab ye muskurāhaT ye jagmagāhaT

ye kis kī ulfat ke haiñ karishme ki har taraf husn pā rahā huuñ

tumheñ mubārak tumhārī mahfil yahāñ se uktā gayā mirā dil

mire irāde raheñ salāmat maiñ apnī manzil pe jā rahā huuñ

ye kunj-e-hastī ye maut kā ghar ye dil ke naġhme nashāt-parvar

fanā kī masnad pe baiTh kar bhī hayāt kā lutf uThā rahā huuñ

tū merī tasvīr-e-ḳhāna-e-dil kī turfa-kārī to dekhtā jā

ye kis kī sūrat kā aks le kar maiñ apnī sūrat banā rahā huuñ

ye kyā ḳhabar dair hai ki ka.aba yahāñ to hai abdiyat kā saudā

kiyā hai tū ne jahāñ ishāra vahīñ sar apnā jhukā rahā huuñ

ye shab kā haijāñ-navāz aalam na koī monis na koī hamdam

to phir kise maiñ fasāna-e-ġham sisak sisak kar sunā rahā huuñ

maiñ us jagah huuñ muqīm 'turfa' qadam qadam par jahāñ hai fitna

magar ḳhudā hai mirā muhāfiz ki aaj tak muskurā rahā huuñ

ye kis ko aaya KHayal mera ye main kise yaad aa raha hun

jigar ki be-tabiyon mein kuchh kuchh sukun sa aaj pa raha hun

ye mah-o-anjum ye nuqrai shab ye muskurahaT ye jagmagahaT

ye kis ki ulfat ke hain karishme ki har taraf husn pa raha hun

tumhein mubarak tumhaari mahfil yahan se ukta gaya mera dil

mere irade rahen salamat main apni manzil pe ja raha hun

ye kunj-e-hasti ye maut ka ghar ye dil ke naghme nashat-parwar

fana ki masnad pe baiTh kar bhi hayat ka lutf uTha raha hun

tu meri taswir-e-KHana-e-dil ki turfa-kari to dekhta ja

ye kis ki surat ka aks le kar main apni surat bana raha hun

ye kya KHabar dair hai ki kaba yahan to hai abdiyat ka sauda

kiya hai tu ne jahan ishaara wahin sar apna jhuka raha hun

ye shab ka haijaan-nawaz aalam na koi monis na koi hamdam

to phir kise main fasana-e-gham sisak sisak kar suna raha hun

main us jagah hun muqim 'turfa' qadam qadam par jahan hai fitna

magar KHuda hai mera muhafiz ki aaj tak muskura raha hun