ye kis liye hai tu itna udas darwaze

ye kis liye hai tū itnā udaas darvāze

pahan liyā hai jo kaalā libās darvāze

tū shām-rañg huā jā rahā hai sub.h se kyuuñ

jhalaktī hai tirī sūrat se yaas darvāze

nihārte ho ye kis kis ko nīm-vā ho kar

parā.e des meñ kaisī ye aas darvāze

hinā.ī haath ke vo lams chhin ga.e jin se

bane hue haiñ sarāpā sipās darvāze

makīñ makāñ meñ na hogā to phir kahāñ hogā

yahīñ kahīñ hai tire ās-pās darvāze

libās aur hai lekin maiñ koī aur nahīñ

mujhe tū bhuul gayā rū-shanās darvāze

mujhe bhī hairat-o-'hasrat' ne but banā Daalā

tujhe bhī zindagī aa.ī na raas darvāze

ye kis liye hai tu itna udas darwaze

pahan liya hai jo kala libas darwaze

tu sham-rang hua ja raha hai subh se kyun

jhalakti hai teri surat se yas darwaze

nihaarte ho ye kis kis ko nim-wa ho kar

parae des mein kaisi ye aas darwaze

hinai hath ke wo lams chhin gae jin se

bane hue hain sarapa sipas darwaze

makin makan mein na hoga to phir kahan hoga

yahin kahin hai tere aas-pas darwaze

libas aur hai lekin main koi aur nahin

mujhe tu bhul gaya ru-shanas darwaze

mujhe bhi hairat-o-'hasrat' ne but bana Dala

tujhe bhi zindagi aai na ras darwaze