ye kis maqam pe laya gaya KHudaya mujhe

ye kis maqām pe laayā gayā ḳhudāyā mujhe

ki aaj rauñd ke guzrā hai merā saaya mujhe

maiñ jaise vaqt ke hāthoñ meñ ik ḳhazāna thā

kisī ne kho diyā mujh ko kisī ne paayā mujhe

na jaane kaun huuñ kis lamha-e-talab meñ huuñ

'nabīl' chain se jiinā kabhī na aayā mujhe

maiñ ek lamha thā aur niiñd ke hisār meñ thā

phir ek roz kisī ḳhvāb ne jagāyā mujhe

usī zamīñ ne sitāra kiyā hai merā vajūd

samajh rahe haiñ zamīñ vaale kyuuñ parāyā mujhe

jahāñ ki sadiyoñ kī ḳhāmoshiyāñ sulagtī haiñ

kisī ḳhayāl kī vahshat ne gungunāyā mujhe

ik aarzū ke ta.āqub meñ yuuñ huā hai 'nabīl'

havā ne ret kī palkoñ pe lā biThāyā mujhe

ye kis maqam pe laya gaya KHudaya mujhe

ki aaj raund ke guzra hai mera saya mujhe

main jaise waqt ke hathon mein ek KHazana tha

kisi ne kho diya mujh ko kisi ne paya mujhe

na jaane kaun hun kis lamha-e-talab mein hun

'nabil' chain se jina kabhi na aaya mujhe

main ek lamha tha aur nind ke hisar mein tha

phir ek roz kisi KHwab ne jagaya mujhe

usi zamin ne sitara kiya hai mera wajud

samajh rahe hain zamin wale kyun paraya mujhe

jahan ki sadiyon ki KHamoshiyan sulagti hain

kisi KHayal ki wahshat ne gungunaya mujhe

ek aarzu ke taaqub mein yun hua hai 'nabil'

hawa ne ret ki palkon pe la biThaya mujhe