ye kis maqam pe Thahra hai karwan-e-wafa

ye kis maqām pe Thahrā hai kārvān-e-vafā

na raushnī kī kiran hai kahīñ na taaza havā

huī hai jab se yahāñ nutq-o-lab kī baḳhiya-garī

sivā.e hasrat-e-iz.hār dil meñ kuchh na rahā

is ehtimām se shab-ḳhūñ paḌā ki muddat se

ujaaḌ sī nazar aatī hai shahr-e-dil kī fazā

tamām umr usī kī talāsh meñ guzrī

vo ek aks jo ā.īna-e-nazar meñ na thā

ye kis ne aaj dabe-pāñv dil meñ aate hī

ḳhayāl-o-fikr kā qufl-e-sukūt toḌ diyā

kuchh is tarah se tirī yaad kī mahak aa.ī

ki jaise dāman-e-sahrā meñ koī phuul khilā

shikast-e-dil pe 'razā' ham bhī TuuT kar ro.e

magar na itne ki so hī sake na ham-sāyā

ye kis maqam pe Thahra hai karwan-e-wafa

na raushni ki kiran hai kahin na taza hawa

hui hai jab se yahan nutq-o-lab ki baKHiya-gari

siwae hasrat-e-izhaar dil mein kuchh na raha

is ehtimam se shab-KHun paDa ki muddat se

ujaD si nazar aati hai shahr-e-dil ki faza

tamam umr usi ki talash mein guzri

wo ek aks jo aaina-e-nazar mein na tha

ye kis ne aaj dabe-panw dil mein aate hi

KHayal-o-fikr ka qufl-e-sukut toD diya

kuchh is tarah se teri yaad ki mahak aai

ki jaise daman-e-sahra mein koi phul khila

shikast-e-dil pe 'raza' hum bhi TuT kar roe

magar na itne ki so hi sake na ham-saya