ye kis ne ahd-e-faramosh se sada di hai

ye kis ne ahd-e-farāmosh se sadā dī hai

abhī charāġh jalā.e hī the havā dī hai

ye virsa ham se na.ī nasl ko kabhī na mile

zabāñ hamāre buzurgoñ ne be-navā dī hai

ḳhirāj-e-ārzū-e-mausam-e-bahār hai ye

lahū lahū jo mire pairahan kī vaadī hai

koī bhī ghar se na nikle charāġh-e-dil le kar

amīr-e-shahr kī ye shahr meñ munādī hai

milī hai ye mah-o-anjum se dostī kī sazā

ki āftāb ne bīnā.ī tak jalā dī hai

kahāñ se kāTo.ge kal tum masarrateñ 'ābid'

ye fasl-e-ashk jo har aañkh meñ ugā dī hai

ye kis ne ahd-e-faramosh se sada di hai

abhi charagh jalae hi the hawa di hai

ye wirsa hum se nai nasl ko kabhi na mile

zaban hamare buzurgon ne be-nawa di hai

KHiraj-e-arzu-e-mausam-e-bahaar hai ye

lahu lahu jo mere pairahan ki wadi hai

koi bhi ghar se na nikle charagh-e-dil le kar

amir-e-shahr ki ye shahr mein munadi hai

mili hai ye mah-o-anjum se dosti ki saza

ki aaftab ne binai tak jala di hai

kahan se kaToge kal tum masarraten 'abid'

ye fasl-e-ashk jo har aankh mein uga di hai