ye kis ne kah diya nakaamiyon ka gham nahin hota

ye kis ne kah diyā nākāmiyoñ kā ġham nahīñ hotā

bahut hotā hai lekin shauq-e-manzil kam nahīñ hotā

yaqīnan aap ke vā'doñ meñ koī dam nahīñ hotā

magar ye bhī haqīqat hai bharosa kam nahīñ hotā

bajā hai aap phir āmāda haiñ tark-e-taġhāful par

magar ab mujh se 'arz-e-mudda'ā paiham nahīñ hotā

ḳhizāñ kī chīra-dastī se na ghabrāo chaman vaalo

jahān-e-zindagī meñ ek hī mausam nahīñ hotā

ta'ajjub se mire pairoñ ke chhāle dekhne vaalo

rah-e-hastī meñ farsh-e-sabza-o-shabnam nahīñ hotā

maiñ girtā huuñ sañbhaltā huuñ qadam aage baḌhātā huuñ

mirī nākāmiyoñ meñ yaas kā 'ālam nahīñ hotā

kahāñ kī bandagī 'shāhid' ise husn-e-talab kahiye

kisī ke āstāñ par sar kisī kā ḳham nahīñ hotā

ye kis ne kah diya nakaamiyon ka gham nahin hota

bahut hota hai lekin shauq-e-manzil kam nahin hota

yaqinan aap ke wa'don mein koi dam nahin hota

magar ye bhi haqiqat hai bharosa kam nahin hota

baja hai aap phir aamada hain tark-e-taghaful par

magar ab mujh se 'arz-e-mudda'a paiham nahin hota

KHizan ki chira-dasti se na ghabrao chaman walo

jahan-e-zindagi mein ek hi mausam nahin hota

ta'ajjub se mere pairon ke chhaale dekhne walo

rah-e-hasti mein farsh-e-sabza-o-shabnam nahin hota

main girta hun sanbhalta hun qadam aage baDhata hun

meri nakaamiyon mein yas ka 'alam nahin hota

kahan ki bandagi 'shahid' ise husn-e-talab kahiye

kisi ke aastan par sar kisi ka KHam nahin hota