ye kis ne kah diya tujhse ki sahil chahta hun main

ye kis ne kah diyā tujh se ki sāhil chāhtā huuñ maiñ

samundar huuñ samundar ko muqābil chāhtā huuñ maiñ

vo ik lamha jo tere qurb kī ḳhushbū se hai raushan

ab is lamhe ko pāband-e-salāsil chāhtā huuñ maiñ

vo chiñgārī jo hai mashshāq fann-e-sho.ala-sāzī meñ

use raushan tah-e-ḳhākistar-e-dil chāhtā huuñ maiñ

bahut be-zār hai umr-e-ravāñ sahrā-navardī se

pa.e-kār-e-junūñ taaza mashāġhil chāhtā huuñ maiñ

na ye ḳhvāhish ki vo miTTī meñ merī jazb ho jaa.e

na ḳhud ko dāstāñ meñ us kī shāmil chāhtā huuñ maiñ

ajab bismil hai 'ishrat' apne qātil se ye kahtā hai

sar-e-mahfil tujhe ai jān-e-mahfil chāhtā huuñ maiñ

ye kis ne kah diya tujh se ki sahil chahta hun main

samundar hun samundar ko muqabil chahta hun main

wo ek lamha jo tere qurb ki KHushbu se hai raushan

ab is lamhe ko paband-e-salasil chahta hun main

wo chingari jo hai mashshaq fann-e-shoala-sazi mein

use raushan tah-e-KHakistar-e-dil chahta hun main

bahut be-zar hai umr-e-rawan sahra-nawardi se

pae-kar-e-junun taza mashaghil chahta hun main

na ye KHwahish ki wo miTTi mein meri jazb ho jae

na KHud ko dastan mein us ki shamil chahta hun main

ajab bismil hai 'ishrat' apne qatil se ye kahta hai

sar-e-mahfil tujhe ai jaan-e-mahfil chahta hun main