ye kis se chandni mein hum ba-zer-e-asman lipTe

ye kis se chāñdnī meñ ham ba-zer-e-āsmāñ lipTe

ki bāham arsh par maare ḳhushī ke qudsiyāñ lipTe

hudī-ḳhvāñ vādī-e-majnūñ meñ naaqe ko na le jaanā

mabādā ik bagūlā sā ba-pā-e-sārbāñ lipTe

adab gar hazrat-e-jibrīl kā maan.e na ho mujh ko

to shāḳh-e-sidra se mere ye āh-e-nā-tavāñ lipTe

sikandar aur daarā kyā karoḌoñ aur bhī un se

paḌe haiñ gor ke taḳhte se zer-e-ḳhākdāñ lipTe

kisī Dhab se tabī.at sair hotī hī nahīñ un se

abhī dālān se laa.e ba-zer-e-sā.ebāñ lipTe

hañse bole rahe mashġhūl apne jis tarah chāhā

udhar lipTe udhar so.e yahāñ chimTe vahāñ lipTe

va-lekin paas kahtī hai ki hoñgī ḳhvāb kī bāteñ

tumheñ kuchh ḳhair hai sāhab batāo to jahāñ lipTe

kidhar loTe kidhar poTe hañse bole kidhar jā kar

kahāñ lipTe kahāñ so.e kahāñ chimTe kahāñ lipTe

ġhazal mastī meñ likh ik aur bhī 'inshā' ki tā tere

balā.eñ aa ke saaqī le tujhe pīr-e-muġhāñ lipTe

ye kis se chandni mein hum ba-zer-e-asman lipTe

ki baham arsh par mare KHushi ke qudsiyan lipTe

hudi-KHwan wadi-e-majnun mein naqe ko na le jaana

mabaada ek bagula sa ba-pa-e-sarban lipTe

adab gar hazrat-e-jibril ka mane na ho mujh ko

to shaKH-e-sidra se mere ye aah-e-na-tawan lipTe

sikandar aur dara kya karoDon aur bhi un se

paDe hain gor ke taKHte se zer-e-KHakdan lipTe

kisi Dhab se tabiat sair hoti hi nahin un se

abhi dalan se lae ba-zer-e-saeban lipTe

hanse bole rahe mashghul apne jis tarah chaha

udhar lipTe udhar soe yahan chimTe wahan lipTe

wa-lekin pas kahti hai ki hongi KHwab ki baaten

tumhein kuchh KHair hai sahab batao to jahan lipTe

kidhar loTe kidhar poTe hanse bole kidhar ja kar

kahan lipTe kahan soe kahan chimTe kahan lipTe

ghazal masti mein likh ek aur bhi 'insha' ki ta tere

balaen aa ke saqi le tujhe pir-e-mughan lipTe