یہ کس تضاد میں گم ہے ترے شباب کا رنگ

یہ کس تضاد میں گم ہے ترے شباب کا رنگ

کبھی کرم کا مرقع کبھی عتاب کا رنگ

ذرا جو دل کی تڑپ میں خلوص پیدا ہو

ہر ایک رنگ پہ چھا جائے اضطراب کا رنگ

ابھی تو آپ کا رخ تجزیے کی زد میں نہیں

اڑا اڑا سا ہے کس واسطے جناب کا رنگ

کسی کی خاص توجہ کا دخل ہے اس میں

جو لمحہ لمحہ بدلنے لگا خطاب کا رنگ

ہر اک کے سامنے بے پردہ آتے جاتے ہو

فقط ہمیں پہ جماتے ہو تم عتاب کا رنگ

طلوع صبح علامت تو جزر و مد کی نہیں

ابھی سے کس لئے بدلا ہے سطح آب کا رنگ

یہ روشنی تو نہیں ہے کسی تغیر کی

بدل رہا ہے جو ہر لمحہ آفتاب کا رنگ

یہ اور بات کہ قاتل سے باز پرس نہ ہو

مرے لہو کی گواہی بنا گلاب کا رنگ

مماثلت کا کوئی شائبہ نہیں ہے سراجؔ

کہاں سوال کا لہجہ کہاں جواب کا رنگ