ye kis tazad mein gum hai tere shabab ka rang

ye kis tazād meñ gum hai tire shabāb kā rang

kabhī karam kā muraqqā kabhī itaab kā rang

zarā jo dil kī taḌap meñ ḳhulūs paidā ho

har ek rang pe chhā jaa.e iztirāb kā rang

abhī to aap kā ruḳh tajziye kī zad meñ nahīñ

uḌā uḌā sā hai kis vāste janāb kā rang

kisī kī ḳhaas tavajjoh kā daḳhl hai is meñ

jo lamha lamha badalne lagā ḳhitāb kā rang

har ik ke sāmne be-parda aate jaate ho

faqat hamīñ pe jamāte ho tum itaab kā rang

tulū-e-sub.h alāmat to jazr-o-mad kī nahīñ

abhī se kis liye badlā hai sat.h-e-āb kā rang

ye raushnī to nahīñ hai kisī taġhayyur kī

badal rahā hai jo har lamha āftāb kā rang

ye aur baat ki qātil se bāz-purs na ho

mire lahū kī gavāhī banā gulāb kā rang

mumāsalat kā koī shā.iba nahīñ hai 'sirāj'

kahāñ savāl kā lahja kahāñ javāb kā rang

ye kis tazad mein gum hai tere shabab ka rang

kabhi karam ka muraqqa kabhi itab ka rang

zara jo dil ki taDap mein KHulus paida ho

har ek rang pe chha jae iztirab ka rang

abhi to aap ka ruKH tajziye ki zad mein nahin

uDa uDa sa hai kis waste janab ka rang

kisi ki KHas tawajjoh ka daKHl hai is mein

jo lamha lamha badalne laga KHitab ka rang

har ek ke samne be-parda aate jate ho

faqat hamin pe jamate ho tum itab ka rang

tulu-e-subh alamat to jazr-o-mad ki nahin

abhi se kis liye badla hai sath-e-ab ka rang

ye raushni to nahin hai kisi taghayyur ki

badal raha hai jo har lamha aaftab ka rang

ye aur baat ki qatil se baz-purs na ho

mere lahu ki gawahi bana gulab ka rang

mumasalat ka koi shaiba nahin hai 'siraj'

kahan sawal ka lahja kahan jawab ka rang