ye kise thi KHabar dil lagane ke baad

ye kise thī ḳhabar dil lagāne ke baa'd

ġham bhī mil jā.eñge muskurāne ke baa'd

kis jahāñ meñ ḳhudā jaane vo kho ga.e

mujh ko ik baar sūrat dikhāne ke baa'd

jaan paayā huuñ maiñ vo hai patthar-jigar

apnī āñkhoñ se aañsū bahāne ke baa'd

bas chalā hai tasavvur pe kis kā bhalā

yaad vo aur aa.e bhulāne ke baa'd

zulm sahtā huuñ kūche meñ ye soch kar

ghar nahīñ dūsrā is Thikāne ke baa'd

ḳhaas fitrat hasīnoñ kī hai dostoñ

vo kareñ tark-e-ulfat nibhāne ke baa'd

jo the apne kabhī ho ga.e ġhair vo

un ko 'tasdīq' apnā banāne ke baa'd

aañkh merī na yuuñ dekh kar bhar ga.ī

aaj dekhā hai us ko zamāne ke baa'd

ye kise thi KHabar dil lagane ke ba'd

gham bhi mil jaenge muskurane ke ba'd

kis jahan mein KHuda jaane wo kho gae

mujh ko ek bar surat dikhane ke ba'd

jaan paya hun main wo hai patthar-jigar

apni aankhon se aansu bahane ke ba'd

bas chala hai tasawwur pe kis ka bhala

yaad wo aur aae bhulane ke ba'd

zulm sahta hun kuche mein ye soch kar

ghar nahin dusra is Thikane ke ba'd

KHas fitrat hasinon ki hai doston

wo karen tark-e-ulfat nibhane ke ba'd

jo the apne kabhi ho gae ghair wo

un ko 'tasdiq' apna banane ke ba'd

aankh meri na yun dekh kar bhar gai

aaj dekha hai us ko zamane ke ba'd