ye koi baat hai sunta na baghban meri

ye koī baat hai suntā na bāġhbāñ merī

kahāñ asar meñ vo Duubī huī fuġhāñ merī

chalī hai aaj sunāne unheñ fuġhāñ merī

are zarūr ye kaTvā.egī zabāñ merī

hilī zabān ki bijlī hai phir fuġhāñ merī

ḳhudā kare na qafas meñ khule zabāñ merī

vo zulf khol ke sharmā.eñ ġhair ke ghar aaj

kuchh is adā se shab-e-ġham ho mehmāñ merī

mujhe ye Dar hai na phūle phale bahār meñ ye

jhukī huī hai bahut shāḳh-e-āshiyāñ merī

ġhazab kā dard qayāmat kā hai asar us meñ

ḳhudā kisī ko na sunvā.e dāstāñ merī

ye dair meñ nahīñ bajte haiñ ḳhud-baḳhud nāqūs

haram meñ guuñj rahī hai buto azaañ merī

tum apne baam se fariyād kī ijāzat do

yahāñ se to nahīñ suntā hai āsmāñ merī

kisī ke aane kā ab intizār kaun kare

pukārtī hai mujhe marg-e-nā-gahāñ merī

kahe kahe na kahe koī mujh ko kyā us se

suneñ suneñ na suneñ aap dāstāñ merī

vo bole hashr meñ khul khelne ko kahte haiñ

satā rahī haiñ mujhe aaj shoḳhiyāñ merī

na dast-e-nāz meñ lo teġh is nazākat se

tumhāre bas kī nahīñ jān-e-nā-tavāñ merī

zabān meñ bhī asar hai mire bayāñ meñ bhī

suneñ na aap mire muñh se dāstāñ merī

jo bosa vasl meñ māñgoñ to deñ sazā mujh ko

jo lab hilā.ūñ to vo kaaT leñ zabāñ merī

maiñ nā-tavāñ bhī gayā aaj baam tak un ke

ye zaar thā ki mujhe le uḌī fuġhāñ merī

sharāb maiñ pas-e-tauba jo māñgoñ bhūle se

to mai-farosh kahe nazr hai dukāñ merī

kuchh ab kī baaġh meñ is dhuum se bahār aa.e

na bāġhbāñ kī sunūñ maiñ na bāġhbāñ merī

jo ye kahā ho mirī aa.ī tujh ko aa jaa.e

mujhe nasīb na ho niiñd pāsbāñ merī

payām maut kā hai yaad unheñ mirī kaisī

kuchh aaj aur hī kahtī haiñ hichkiyāñ merī

vo bole abrū-o-mizhgāñ ko kyā huā shab-e-vasl

dhare rahe yūñhī nāvak mire kamāñ merī

uThā.ūñ afv kī lazzat bhī lutf-e-isyāñ bhī

mire karīm ye taqdīr hai kahāñ merī

satāne vaale ko kuchh qadr ho satāne kī

unheñ satā.e jo maane ye āsmāñ merī

vo maiñ huuñ aaj zamāne ko naaz hai jis par

'riyāz' dhuum hai jis kī vo hai zabāñ merī

ye koi baat hai sunta na baghban meri

kahan asar mein wo Dubi hui fughan meri

chali hai aaj sunane unhen fughan meri

are zarur ye kaTwaegi zaban meri

hili zaban ki bijli hai phir fughan meri

KHuda kare na qafas mein khule zaban meri

wo zulf khol ke sharmaen ghair ke ghar aaj

kuchh is ada se shab-e-gham ho mehman meri

mujhe ye Dar hai na phule phale bahaar mein ye

jhuki hui hai bahut shaKH-e-ashiyan meri

ghazab ka dard qayamat ka hai asar us mein

KHuda kisi ko na sunwae dastan meri

ye dair mein nahin bajte hain KHud-baKHud naqus

haram mein gunj rahi hai buto azan meri

tum apne baam se fariyaad ki ijazat do

yahan se to nahin sunta hai aasman meri

kisi ke aane ka ab intizar kaun kare

pukarti hai mujhe marg-e-na-gahan meri

kahe kahe na kahe koi mujh ko kya us se

sunen sunen na sunen aap dastan meri

wo bole hashr mein khul khelne ko kahte hain

sata rahi hain mujhe aaj shoKHiyan meri

na dast-e-naz mein lo tegh is nazakat se

tumhaare bas ki nahin jaan-e-na-tawan meri

zaban mein bhi asar hai mere bayan mein bhi

sunen na aap mere munh se dastan meri

jo bosa wasl mein mangon to den saza mujh ko

jo lab hilaun to wo kaT len zaban meri

main na-tawan bhi gaya aaj baam tak un ke

ye zar tha ki mujhe le uDi fughan meri

sharab main pas-e-tauba jo mangon bhule se

to mai-farosh kahe nazr hai dukan meri

kuchh ab ki bagh mein is dhum se bahaar aae

na baghban ki sunun main na baghban meri

jo ye kaha ho meri aai tujh ko aa jae

mujhe nasib na ho nind pasban meri

payam maut ka hai yaad unhen meri kaisi

kuchh aaj aur hi kahti hain hichkiyan meri

wo bole abru-o-mizhgan ko kya hua shab-e-wasl

dhare rahe yunhi nawak mere kaman meri

uThaun afw ki lazzat bhi lutf-e-isyan bhi

mere karim ye taqdir hai kahan meri

satane wale ko kuchh qadr ho satane ki

unhen satae jo mane ye aasman meri

wo main hun aaj zamane ko naz hai jis par

'riyaz' dhum hai jis ki wo hai zaban meri