ye kya bataen ki kis rahguzar ki gard hue

ye kyā batā.eñ ki kis rahguzar kī gard hue

ham aise log ḳhud apne safar kī gard hue

najāt yuuñ bhī bikharne ke karb se na milī

hue jo aa.ina sab kī nazar kī gard hue

ye kin dukhoñ ne cham-o-ḳham tamām chhīn liyā

shuā-e-mahr se ham bhī sharar kī gard hue

sab apne apne ufuq par chamak ke thoḌī der

mujhe to dāman-e-shām-o-sahar kī gard hue

pukāro kah ke hameñ chhāñv jī na bahlegā

bache jo dhuup se pā-e-shajar kī gard hue

hameñ bhī bolnā aatā hai phir bhī haiñ ḳhāmosh

ki ham tire suḳhan-e-muḳhtasar kī gard hue

dhulā sā chehra bhī kuchh maañd paḌ gayā āḳhir

hue na ashk tirī chashm-e-tar kī gard hue

sharīr-o-tund havā thī ki rau ma.ānī kī

tamām lafz lab-e-mo'tabar kī gard hue

ye raah kitnī pur-āshob hai 'fazā' na kaho

qalam kī raah chale ham hunar kī gard hue

ye kya bataen ki kis rahguzar ki gard hue

hum aise log KHud apne safar ki gard hue

najat yun bhi bikharne ke karb se na mili

hue jo aaina sab ki nazar ki gard hue

ye kin dukhon ne cham-o-KHam tamam chhin liya

shua-e-mahr se hum bhi sharar ki gard hue

sab apne apne ufuq par chamak ke thoDi der

mujhe to daman-e-sham-o-sahar ki gard hue

pukaro kah ke hamein chhanw ji na bahlega

bache jo dhup se pa-e-shajar ki gard hue

hamein bhi bolna aata hai phir bhi hain KHamosh

ki hum tere suKHan-e-muKHtasar ki gard hue

dhula sa chehra bhi kuchh mand paD gaya aaKHir

hue na ashk teri chashm-e-tar ki gard hue

sharir-o-tund hawa thi ki rau maani ki

tamam lafz lab-e-mo'tabar ki gard hue

ye rah kitni pur-ashob hai 'faza' na kaho

qalam ki rah chale hum hunar ki gard hue