ye kya hua ki ug aae azab kheton mein

ye kyā huā ki ug aa.e azaab khetoñ meñ

yahāñ kisān ne bo.e the ḳhvāb khetoñ meñ

sunā hai aa.e the ḳhushbū ḳharīdne vaale

bahut lagā.e haiñ tum ne gulāb khetoñ meñ

badan pe us ke harā rang khil rahā hai bahut

vo dekho fasl pe aaya shabāb khetoñ meñ

maiñ aaj shahr se gaañv kī samt lauTā to

mujhe dikhe haiñ ka.ī māhtāb khetoñ meñ

ab us ko shahr ke maiḳhāne achchhe lagte nahīñ

ki us ne pī thī bas ik din sharāb khetoñ meñ

to kyā ye rūpiya luqma banā ke khāoge

anaaj hotā hai paidā janāb khetoñ meñ

sunahrī miTTī kī ḳhushkī batā rahī 'dilbar'

paḌā nahīñ hai bahut din se aab khetoñ meñ

ye kya hua ki ug aae azab kheton mein

yahan kisan ne boe the KHwab kheton mein

suna hai aae the KHushbu KHaridne wale

bahut lagae hain tum ne gulab kheton mein

badan pe us ke hara rang khil raha hai bahut

wo dekho fasl pe aaya shabab kheton mein

main aaj shahr se ganw ki samt lauTa to

mujhe dikhe hain kai mahtab kheton mein

ab us ko shahr ke maiKHane achchhe lagte nahin

ki us ne pi thi bas ek din sharab kheton mein

to kya ye rupiya luqma bana ke khaoge

anaj hota hai paida janab kheton mein

sunahri miTTi ki KHushki bata rahi 'dilbar'

paDa nahin hai bahut din se aab kheton mein