یہ کیا ہوا کہ اگ آئے عذاب کھیتوں میں

یہ کیا ہوا کہ اگ آئے عذاب کھیتوں میں

یہاں کسان نے بوئے تھے خواب کھیتوں میں

سنا ہے آئے تھے خوشبو خریدنے والے

بہت لگائے ہیں تم نے گلاب کھیتوں میں

بدن پہ اس کے ہرا رنگ کھل رہا ہے بہت

وہ دیکھو فصل پے آیا شباب کھیتوں میں

میں آج شہر سے گاؤں کی سمت لوٹا تو

مجھے دکھے ہیں کئی ماہتاب کھیتوں میں

اب اس کو شہر کے میخانے اچھے لگتے نہیں

کہ اس نے پی تھی بس اک دن شراب کھیتوں میں

تو کیا یہ روپیہ لقمہ بنا کے کھاؤ گے

اناج ہوتا ہے پیدا جناب کھیتوں میں

سنہری مٹی کی خشکی بتا رہی دلبرؔ

پڑا نہیں ہے بہت دن سے آب کھیتوں میں