ye kya KHabar hai ki wo be-KHabar nahin aata

ye kyā ḳhabar hai ki vo be-ḳhabar nahīñ aatā

hameñ to hosh hī do-do pahar nahīñ aatā

tumhārī chaal ke fitne bhī haiñ qayāmat ke

ki jin ke ḳhauf se mahshar idhar nahīñ aatā

tamām umr agar āb-e-ashk se sīñcheñ

umiid ke to shajar meñ samar nahīñ aatā

vo paan khā ke raqīboñ ko de rahī haiñ ugaal

ilāhī kyoñ mire muñh ko jigar nahīñ aatā

zakāt-e-husn nikālo uThāo lutf-e-shabāb

ye vaqt jā ke to phir umr bhar nahīñ aatā

diyā marīz-e-mohabbat ko nusḳha-e-tap-e-diq

tujhe ilaaj bhī ai chārāgar nahīñ aatā

bhalā maiñ aur ḳhushāmad karūñ raqīboñ kī

vahī batāte ho jo kaam kar nahīñ aatā

vo be-naqāb haiñ istāda ġhair ke aage

aur āftāb savā neze par nahīñ aatā

ye kyā mohabbat-o-ulfat ki baad marne ke

koī mazār meñ lene ḳhabar nahīñ aatā

haram meñ zāhido kyā dil bahalne kī sūrat

lagāo laakh maiñ us raah par nahīñ aatā

kahā thā ġhair se kyā mujh ko dekh kar tum ne

aur us pe kahte ho mujh ko to shar nahīñ aatā

nivāla muñh kā nahīñ fann-e-shā.irī ai 'bazm'

ye kaam vo hai ki jo umr bhar nahīñ aatā

ye kya KHabar hai ki wo be-KHabar nahin aata

hamein to hosh hi do-do pahar nahin aata

tumhaari chaal ke fitne bhi hain qayamat ke

ki jin ke KHauf se mahshar idhar nahin aata

tamam umr agar aab-e-ashk se sinchen

umid ke to shajar mein samar nahin aata

wo pan kha ke raqibon ko de rahi hain ugal

ilahi kyon mere munh ko jigar nahin aata

zakat-e-husn nikalo uThao lutf-e-shabab

ye waqt ja ke to phir umr bhar nahin aata

diya mariz-e-mohabbat ko nusKHa-e-tap-e-diq

tujhe ilaj bhi ai chaaragar nahin aata

bhala main aur KHushamad karun raqibon ki

wahi batate ho jo kaam kar nahin aata

wo be-naqab hain istada ghair ke aage

aur aaftab sawa neze par nahin aata

ye kya mohabbat-o-ulfat ki baad marne ke

koi mazar mein lene KHabar nahin aata

haram mein zahido kya dil bahalne ki surat

lagao lakh main us rah par nahin aata

kaha tha ghair se kya mujh ko dekh kar tum ne

aur us pe kahte ho mujh ko to shar nahin aata

niwala munh ka nahin fann-e-shairi ai 'bazm'

ye kaam wo hai ki jo umr bhar nahin aata