ye kya ki chehra naqab-andar-naqab rakkho

ye kyā ki chehra naqāb-andar-naqāb rakkho

yahī hai kaafī bachā ke āñkhoñ kī aab rakkho

kahā ye kis ne ki roz-o-shab kā hisāb rakkho

ba-nām-e-jāñ karb-e-mustaqil kā azaab rakkho

saroñ ke uupar se jo tumhāre guzar ga.ī hai

hamāre hisse meñ dosto vo kitāb rakkho

rah-e-tamannā meñ jin se raqsāñ hoñ māh-o-anjum

tum apnī āñkhoñ meñ raushnī ke vo ḳhvāb rakkho

bhaTak na jaa.e koī musāfir rah-e-talab meñ

har ek naqsh-e-qadam meñ tum āftāb rakkho

ufuq-ufuq āftāb-e-tāza kī zau-fishānī

jo ho sake to nazar-nazar inqalāb rakkho

mirā ta.āruf hai naam merā kalām merā

tumheñ mubārak tum apne saare ḳhitāb rakkho

ye kya ki chehra naqab-andar-naqab rakkho

yahi hai kafi bacha ke aankhon ki aab rakkho

kaha ye kis ne ki roz-o-shab ka hisab rakkho

ba-nam-e-jaan karb-e-mustaqil ka azab rakkho

saron ke upar se jo tumhaare guzar gai hai

hamare hisse mein dosto wo kitab rakkho

rah-e-tamanna mein jin se raqsan hon mah-o-anjum

tum apni aankhon mein raushni ke wo KHwab rakkho

bhaTak na jae koi musafir rah-e-talab mein

har ek naqsh-e-qadam mein tum aaftab rakkho

ufuq-ufuq aaftab-e-taza ki zau-fishani

jo ho sake to nazar-nazar inqalab rakkho

mera taaruf hai nam mera kalam mera

tumhein mubarak tum apne sare KHitab rakkho