یہ کیا مقام تری رہ گزر میں آئے ہیں

یہ کیا مقام تری رہ گزر میں آئے ہیں

کوئی بھی غیر نہیں اور سب پرائے ہیں

حیات جن کے تصور سے جگمگا اٹھے

وہ تابناک اندھیرے کہاں سمائے ہیں

یہ جرم ہے تو کوئی بے سبب نہیں کرتا

پڑی ہے چوٹ جگر پر تو مسکرائے ہیں

ہم اور دل کی تباہی پہ غور فرمائیں

یہ حادثے تو کئی بار پیش آئے ہیں

پڑی ہے جب بھی ضرورت ثبوت یزداں کی

مرے کواڑ زمانے نے کھٹکھٹائے ہیں

وہ انقلاب نہ جانے کب آئے گا عشرتؔ

جس انقلاب کی حسرت میں جگ بتائے ہیں