ye kya shikwa ki wo apna nahin hai

ye kyā shikva ki vo apnā nahīñ hai

mohabbat ḳhuun kā rishta nahīñ hai

jo maiñ ne kah diyā ho kar rahegā

mirā mashrab ġham-e-fardā nahīñ hai

bahut pahle maiñ us ko paḌh chukā huuñ

merī qismat meñ jo likkhā nahīñ hai

ghaTā rahtā hai dil meñ kuchh dhuāñ sā

ye bādal aaj tak barsā nahīñ hai

javānī jitne muñh utnī hī bāteñ

mohabbat aaj bhī rusvā nahīñ hai

vafā meñ rāhateñ kyā DhūñDte ho

vafā dīvār hai saaya nahīñ hai

ye baat ahl-e-nazar kab jānte haiñ

akelā to hai dil tanhā nahīñ hai

sahī apne na ban paa.e kisī ke

koī apnā na ho aisā nahīñ hai

mizāj-e-yār se nālāñ ho 'anjum'

tumheñ shāyad ġhazal kahnā nahīñ hai

ye kya shikwa ki wo apna nahin hai

mohabbat KHun ka rishta nahin hai

jo main ne kah diya ho kar rahega

mera mashrab gham-e-farda nahin hai

bahut pahle main us ko paDh chuka hun

meri qismat mein jo likkha nahin hai

ghaTa rahta hai dil mein kuchh dhuan sa

ye baadal aaj tak barsa nahin hai

jawani jitne munh utni hi baaten

mohabbat aaj bhi ruswa nahin hai

wafa mein rahaten kya DhunDte ho

wafa diwar hai saya nahin hai

ye baat ahl-e-nazar kab jaante hain

akela to hai dil tanha nahin hai

sahi apne na ban pae kisi ke

koi apna na ho aisa nahin hai

mizaj-e-yar se nalan ho 'anjum'

tumhein shayad ghazal kahna nahin hai