ye kya tauhin-e-mai-KHana nahin hai

ye kyā tauhīn-e-mai-ḳhāna nahīñ hai

surāhī hai to paimāna nahīñ hai

dar-e-daulat ke chakkar aap kāTeñ

mirī fitrat ġhulāmāna nahīñ hai

ta.ajjub hai ki ahl-e-shahr ne bhī

abhī tak mujh ko pahchānā nahīñ hai

chhalak jaatī hai un kā naam sun kar

agarche aañkh paimāna nahīñ hai

maiñ tishna-lab bhī uTh saktā huuñ saaqī

magar ye shān-e-mai-ḳhāna nahīñ hai

vo dil bhī dekhne kī chiiz hogā

ujaḌ kar bhī jo vīrāna nahīñ hai

mirā maslak faqīrāna hai lekin

mirī hālat faqīrāna nahīñ hai

koī kyuuñ qadr-e-ahl-e-dil karegā

koī mujh sā to dīvāna nahīñ hai

bahak jaate haiñ vo ik ghūñT pī kar

ye koī vaz-e-rindāna nahīñ hai

janāb-e-'shauq' be-had muztarib haiñ

magar nazdīk mai-ḳhāna nahīñ hai

ye kya tauhin-e-mai-KHana nahin hai

surahi hai to paimana nahin hai

dar-e-daulat ke chakkar aap kaTen

meri fitrat ghulamana nahin hai

tajjub hai ki ahl-e-shahr ne bhi

abhi tak mujh ko pahchana nahin hai

chhalak jati hai un ka nam sun kar

agarche aankh paimana nahin hai

main tishna-lab bhi uTh sakta hun saqi

magar ye shan-e-mai-KHana nahin hai

wo dil bhi dekhne ki chiz hoga

ujaD kar bhi jo virana nahin hai

mera maslak faqirana hai lekin

meri haalat faqirana nahin hai

koi kyun qadr-e-ahl-e-dil karega

koi mujh sa to diwana nahin hai

bahak jate hain wo ek ghunT pi kar

ye koi waz-e-rindana nahin hai

janab-e-'shauq' be-had muztarib hain

magar nazdik mai-KHana nahin hai