یہ لشکری جو ہمارے سروں تک آ گئے ہیں

یہ لشکری جو ہمارے سروں تک آ گئے ہیں

حواس باختہ ہم تو چھتوں تک آ گئے ہیں

یہ اپنے گھر کی منڈیروں پہ ناچنے والے

فصیل کاٹتے گھر کی جڑوں تک آ گئے ہیں

جنون بانٹ رہے تھے وہ شاہراہوں پر

قرار ڈھونڈنے والے گھروں تک آ گئے ہیں

اڑان بھرنی پڑی حاسدین کے ڈر سے

پروں کو کاٹنے والے پروں تک آ گئے ہیں

وطن رہے نہ رہے ان کو کچھ غرض ہی نہیں

وہ طعنے دیتے ہوئے رہبروں تک آ گئے ہیں

لگا ہوا ہے تماشا ادھر بھی ایواں میں

یہاں بھی راز نہاں رہزنوں تک آ گئے ہیں

اب ان کے ہاتھ جھٹکنا ضرور ہیں شہزادؔ

کہ ان کے ہاتھ ہماری رگوں تک آ گئے ہیں