ye lashkari jo hamare saron tak aa gae hain

ye lashkarī jo hamāre saroñ tak aa ga.e haiñ

havās-bhāḳhta ham to chhatoñ tak aa ga.e haiñ

ye apne ghar kī muñDeroñ pe nāchne vaale

fasīl kāTte ghar kī jaḌoñ tak aa ga.e haiñ

junūn baañT rahe the vo shāh-rāhoñ par

qarār DhūñDne vaale gharoñ tak aa ga.e haiñ

uḌaan bharnī paḌī hāsidīn ke Dar se

paroñ ko kāTne vaale paroñ tak aa ga.e haiñ

vatan rahe na rahe un ko kuchh ġharaz hī nahīñ

vo tā'ne dete hue rahbaroñ tak aa ga.e haiñ

lagā huā hai tamāshā idhar bhī aivāñ meñ

yahāñ bhī rāz-e-nihāñ rahzanoñ tak aa ga.e haiñ

ab un ke haath jhaTaknā zarūr haiñ 'shahzād'

ki un ke haath hamārī ragoñ tak aa ga.e haiñ

ye lashkari jo hamare saron tak aa gae hain

hawas-bhaKHta hum to chhaton tak aa gae hain

ye apne ghar ki munDeron pe nachne wale

fasil kaTte ghar ki jaDon tak aa gae hain

junun banT rahe the wo shah-rahon par

qarar DhunDne wale gharon tak aa gae hain

uDan bharni paDi hasidin ke Dar se

paron ko kaTne wale paron tak aa gae hain

watan rahe na rahe un ko kuchh gharaz hi nahin

wo ta'ne dete hue rahbaron tak aa gae hain

laga hua hai tamasha idhar bhi aiwan mein

yahan bhi raaz-e-nihan rahzanon tak aa gae hain

ab un ke hath jhaTakna zarur hain 'shahzad'

ki un ke hath hamari ragon tak aa gae hain