ye log jo tujhe baad-e-saba nahin kahte

ye log jo tujhe bād-e-sabā nahīñ kahte

tū ham se pūchh tujhe dil meñ kyā nahīñ kahte

diloñ kī aag to kundan banāyā kartī hai

ham aisī aag ko ātish-kada nahīñ kahte

jo apne yaar se muḳhlis na ho vo mar jaa.e

ham aise log ise badduā nahīñ kahte

yahāñ pe ek aqīda hai aur vo Dar hai

yahāñ ke log ḳhudā ko ḳhudā nahīñ kahte

sarasvatī kī nazar hai hamārī ġhazloñ par

ham is yaqīn pe kuchh bhī burā nahīñ kahte

kahā to thā ki tumhārī bahut zarūrat hai

ham ek baat kabhī bārhā nahīñ kahte

to kyā vo āñkheñ tumheñ har jagah nahīñ dikhtīñ

bhaTaktī chiiz ko tum aatmā nahīñ kahte

ye be-hisī bhī to terī atā hai logoñ ko

jo tere zaḳhm ko terī sazā nahīñ kahte

tumhāre baad kashish hī nahīñ kisī shai meñ

kisī madār ko ham dā.era nahīñ kahte

ġhazal ke saath zamāne ke zaḳhm bhartā huuñ

ab is hunar ko bhī tum mo.ajiza nahīñ kahte

ye log jo tujhe baad-e-saba nahin kahte

tu hum se puchh tujhe dil mein kya nahin kahte

dilon ki aag to kundan banaya karti hai

hum aisi aag ko aatish-kada nahin kahte

jo apne yar se muKHlis na ho wo mar jae

hum aise log ise baddua nahin kahte

yahan pe ek aqida hai aur wo Dar hai

yahan ke log KHuda ko KHuda nahin kahte

saraswati ki nazar hai hamari ghazlon par

hum is yaqin pe kuchh bhi bura nahin kahte

kaha to tha ki tumhaari bahut zarurat hai

hum ek baat kabhi barha nahin kahte

to kya wo aankhen tumhein har jagah nahin dikhtin

bhaTakti chiz ko tum aatma nahin kahte

ye be-hisi bhi to teri ata hai logon ko

jo tere zaKHm ko teri saza nahin kahte

tumhaare baad kashish hi nahin kisi shai mein

kisi madar ko hum daera nahin kahte

ghazal ke sath zamane ke zaKHm bharta hun

ab is hunar ko bhi tum moajiza nahin kahte