ye mah-pare to dil ko lubhae jate hain

ye māh-pāre to dil ko lubhā.e jaate haiñ

jo ġham ke maare haiñ dil ko gañvā.e jaate haiñ

shab-e-firāq ye ākāsh se ḳhabar aa.ī

ki ġham-nasīboñ se taare ginā.e jaate haiñ

hayāt kyā hai ki afsāna dard-nākī kā

fasāne dard ke har dam sunā.e jaate haiñ

jahān-e-kohna ho yā nau ye vo jahāñ hai jahāñ

tamāshe ġham ke hamesha dikhā.e jaate haiñ

agar haiñ harf-e-ġhalat kī tarah nahīñ ham log

jahāñ ke lauh se phir kyoñ miTā.e jaate haiñ

ajiib haal hai duniyā kī bazm kā 'ḳhurshīd'

qadam qadam pe yahāñ dil jalā.e jaate haiñ

ye mah-pare to dil ko lubhae jate hain

jo gham ke mare hain dil ko ganwae jate hain

shab-e-firaq ye aakash se KHabar aai

ki gham-nasibon se tare ginae jate hain

hayat kya hai ki afsana dard-naki ka

fasane dard ke har dam sunae jate hain

jahan-e-kohna ho ya nau ye wo jahan hai jahan

tamashe gham ke hamesha dikhae jate hain

agar hain harf-e-ghalat ki tarah nahin hum log

jahan ke lauh se phir kyon miTae jate hain

ajib haal hai duniya ki bazm ka 'KHurshid'

qadam qadam pe yahan dil jalae jate hain