یہ مانا نت نئے فتنے عجب رنجن و محن جاگے

یہ مانا نت نئے فتنے عجب رنجن و محن جاگے

مگر یہ بھی تو دیکھو چار سو کیا کیا چمن جاگے

بجھے بیٹھے رہیں کب تک بس اب شیشے کو چھلکاؤ

لہو چہکے نفس مہکے خرد ناچے بدن جاگے

کوئی ایسی بھی ساعت ہو کوئی ایسی بھی شب آئے

کہ میری حسرتیں سو جائیں تیرا بانکپن جاگے

کتاب جسم نرمی سے ورق اندر ورق دیکھیں

حجاب شوق گرمی سے شکن اندر شکن جاگے

خمار بے دلی حد سے فزوں ہے اور دل تنہا

کوئی ایسی غزل چھیڑو کہ ہر داغ کہن جاگے

کہو گیسوئے مشکیں سے کہ بادل جھوم کر اٹھیں

ذرا بند قبا کھولو کہ گل کی انجمن جاگے

پیو وہ شے جو ہم پیتے ہیں جم پیتا تھا زمزم کیا

جسے پینے سے اے واعظ نہ تن جاگے نہ من جاگے