ye mai-KHana bara-e-mai-kashan hota to kya hota

ye mai-ḳhāna barā-e-mai-kashāñ hotā to kyā hotā

unhīñ ke vāste pīr-e-muġhāñ hotā to kyā hotā

luTā dī daulat-e-hosh-o-ḳhirad to mudda'ā paayā

hameñ andesha-e-sūd-o-ziyāñ hotā to kyā hotā

hameñ to āzmāyā tum ne aur sābit-qadam paayā

raqīb-e-rū-siyah kā imtihāñ hotā to kyā hotā

sarāpā zīnat-e-bazm-e-raqībāñ ban ke baiThe ho

kabhī aisā barā-e-dostāñ hotā to kyā hotā

na 'qaisar' hai na 'kaifī' hai na 'āsī' hai na 'shā.eq' hai

koī ab shā.ir-e-sho.ala-bayāñ hotā to kyā hotā

bisāt-e-āshiyāñ kyā barq ye to chaar tinke haiñ

tirī zad meñ pa saarā gulsitāñ hotā to kyā hotā

ye mai-KHana bara-e-mai-kashan hota to kya hota

unhin ke waste pir-e-mughan hota to kya hota

luTa di daulat-e-hosh-o-KHirad to mudda'a paya

hamein andesha-e-sud-o-ziyan hota to kya hota

hamein to aazmaya tum ne aur sabit-qadam paya

raqib-e-ru-siyah ka imtihan hota to kya hota

sarapa zinat-e-bazm-e-raqiban ban ke baiThe ho

kabhi aisa bara-e-dostan hota to kya hota

na 'qaisar' hai na 'kaifi' hai na 'asi' hai na 'shaeq' hai

koi ab shair-e-shoala-bayan hota to kya hota

bisat-e-ashiyan kya barq ye to chaar tinke hain

teri zad mein pa sara gulsitan hota to kya hota