ye main nahin hun jo shamon ko ghar mein aata hun

ye maiñ nahīñ huuñ jo shāmoñ ko ghar meñ aatā huuñ

kahīñ se ḳhud sā koī roz DhūñDh laatā huuñ

khulā na jī pe jo dukh maiñ vahī bhulātā huuñ

zarā sī baat ko kitne baras lagātā huuñ

tumhārī aañkh kā gum-karda rabt banñe ko

ye roz ḳhud ko kahāñ se maiñ DhūñD laatā huuñ

maiñ apne zehn meñ tanhā rahā huuñ misl-e-ḳhayāl

maiñ apne jī ke hī dukh sau tarah manātā huuñ

bahut dinoñ se nahīñ mujh pe din Dhalā jaise

maiñ tere rāstoñ pe shaam banñe aatā huuñ

ye mauj mauj sī gahrā.ī ban ke chhū na mujhe

ki maiñ vasī.a kināroñ ke dukh uThātā huuñ

vo yaad hai mirī bātoñ kī tū ki ab bhī tujhe

maiñ dekh luuñ to bahut ḳhud ko yaad aatā huuñ

maiñ intishār hī meñ rah sakā mukammal 'talḳh'

vo silsila huuñ ki juḌne meñ TuuT jaatā huuñ

ye main nahin hun jo shamon ko ghar mein aata hun

kahin se KHud sa koi roz DhunDh lata hun

khula na ji pe jo dukh main wahi bhulata hun

zara si baat ko kitne baras lagata hun

tumhaari aankh ka gum-karda rabt banne ko

ye roz KHud ko kahan se main DhunD lata hun

main apne zehn mein tanha raha hun misl-e-KHayal

main apne ji ke hi dukh sau tarah manata hun

bahut dinon se nahin mujh pe din Dhala jaise

main tere raston pe sham banne aata hun

ye mauj mauj si gahrai ban ke chhu na mujhe

ki main wasia kinaron ke dukh uThata hun

wo yaad hai meri baaton ki tu ki ab bhi tujhe

main dekh lun to bahut KHud ko yaad aata hun

main intishaar hi mein rah saka mukammal 'talKH'

wo silsila hun ki juDne mein TuT jata hun