یہ میں نے کون سا پھل چکھ لیا ہے وحشت میں

یہ میں نے کون سا پھل چکھ لیا ہے وحشت میں

برہنہ ہونے لگا پھر میں اپنی جنت میں

خدا بزرگ و غنی خلق محو قیل و قال

فقیر شاد و مگن حجرۂ ولایت میں

یہ صبر و شکر کی دولت مری کمائی ہے

پڑا ہوں ورنہ ترے سایۂ اذیت میں

بدن کی پیاسی صداؤں نے خود کشی کر لی

میں جی رہا ہوں کسی یاد کی رفاقت میں

تمہارے ہجر کدے کے نمک پہ گزراں ہے

عزیز تر ہے یہ نعمت ہر ایک نعمت میں

خدا نمازیں دعائیں یہ چلے نذر و نیاز

میں اعتبار گنواتا رہا محبت میں