ye maine kaun sa phal chakh liya hai wahshat mein

ye maiñ ne kaun sā phal chakh liyā hai vahshat meñ

barahna hone lagā phir maiñ apnī jannat meñ

ḳhudā buzurg-o-ġhanī ḳhalq mahv-e-qīl-o-qāl

faqīr shād-o-magan hujra-e-vilāyat meñ

ye sabr-o-shukr kī daulat mirī kamā.ī hai

paḌā huuñ varna tire sāya-e-aziyyat meñ

badan kī pyāsī sadāoñ ne ḳhud-kushī kar lī

maiñ jī rahā huuñ kisī yaad kī rifāqat meñ

tumhāre hijr-kade ke namak pe guzarāñ hai

‘azīz-tar hai ye ne'mat har ek ne'mat meñ

ḳhudā namāzeñ du'ā.eñ ye chille nazr-o-niyāz

maiñ e'tibār gañvātā rahā mohabbat meñ

ye main ne kaun sa phal chakh liya hai wahshat mein

barahna hone laga phir main apni jannat mein

KHuda buzurg-o-ghani KHalq mahw-e-qil-o-qal

faqir shad-o-magan hujra-e-wilayat mein

ye sabr-o-shukr ki daulat meri kamai hai

paDa hun warna tere saya-e-aziyyat mein

badan ki pyasi sadaon ne KHud-kushi kar li

main ji raha hun kisi yaad ki rifaqat mein

tumhaare hijr-kade ke namak pe guzaran hai

‘aziz-tar hai ye ne'mat har ek ne'mat mein

KHuda namazen du'aen ye chille nazr-o-niyaz

main e'tibar ganwata raha mohabbat mein