ye marhale bhi mohabbat ke bab mein aae

ye marhale bhī mohabbat ke baab meñ aa.e

ḳhulūs chāhā to patthar javāb meñ aa.e

ḳhushā vo shauq ki dar dar liye phirā mujh ko

zah-e-nasīb ki tum intiḳhāb meñ aa.e

hazār zabt karūñ laakh dil ko bahlā.ūñ

magar vo shakl jo har roz ḳhvāb meñ aa.e

maiñ kyā kahūñ ki tirā zikr ġhair se sun kar

jo vasvase dil-e-ḳhāna-ḳharāb meñ aa.e

hai shahryār kī qurbat se fāsla behtar

rahe jo qurb meñ aksar itaab meñ aa.e

vahīñ qabīla-e-murda-zamīr likh denā

hamārā zikr jahāñ bhī kitāb meñ aa.e

riyā ke daur meñ sach bol to rahe ho magar

ye vasf hī na kahīñ ehtisāb meñ aa.e

maiñ apne des kī miTTī se pyaar kartā huuñ

ye jurm bhī mirī fard-e-hisāb meñ aa.e

ye marhale bhi mohabbat ke bab mein aae

KHulus chaha to patthar jawab mein aae

KHusha wo shauq ki dar dar liye phira mujh ko

zah-e-nasib ki tum intiKHab mein aae

hazar zabt karun lakh dil ko bahlaun

magar wo shakl jo har roz KHwab mein aae

main kya kahun ki tera zikr ghair se sun kar

jo waswase dil-e-KHana-KHarab mein aae

hai shahryar ki qurbat se fasla behtar

rahe jo qurb mein aksar itab mein aae

wahin qabila-e-murda-zamir likh dena

hamara zikr jahan bhi kitab mein aae

riya ke daur mein sach bol to rahe ho magar

ye wasf hi na kahin ehtisab mein aae

main apne des ki miTTi se pyar karta hun

ye jurm bhi meri fard-e-hisab mein aae