ye marhale bhi mohabbat ke bab mein aae

ye marhale bhī mohabbat ke baab meñ aa.e

bichhaḌ ga.e the jo ham se vo ḳhvāb meñ aa.e

vo jis kī raah meñ ham ne bichhā.e ġhuncha-o-gul

usī makān se patthar javāb meñ aa.e

na jis ko dast-e-hinā.ī kā tere lams mile

kahāñ se bū-e-vafā us gulāb meñ aa.e

tumhāre husn-e-nazar se haiñ mo'atabar ham bhī

jo ham kisī nigah-e-intiḳhāb meñ aa.e

agarche misl hai āb-e-ravāñ ke reg-e-sarāb

kahāñ se shorish-e-dariyā sarāb meñ aa.e

tire ḳhayāl kā paikar sajā hai siine meñ

ham is tarah tirī chashm-e-ḳhush-āb meñ aa.e

havā ke dosh pe us ne likhā hai nām-e-'ra.īs'

ye sun ke log bahut pech-o-tāb meñ aa.e

ye marhale bhi mohabbat ke bab mein aae

bichhaD gae the jo hum se wo KHwab mein aae

wo jis ki rah mein hum ne bichhae ghuncha-o-gul

usi makan se patthar jawab mein aae

na jis ko dast-e-hinai ka tere lams mile

kahan se bu-e-wafa us gulab mein aae

tumhaare husn-e-nazar se hain mo'atabar hum bhi

jo hum kisi nigah-e-intiKHab mein aae

agarche misl hai aab-e-rawan ke reg-e-sarab

kahan se shorish-e-dariya sarab mein aae

tere KHayal ka paikar saja hai sine mein

hum is tarah teri chashm-e-KHush-ab mein aae

hawa ke dosh pe us ne likha hai nam-e-'rais'

ye sun ke log bahut pech-o-tab mein aae