ye mast mast phul ye aamad bahaar ki

ye mast mast phuul ye aamad bahār kī

duniyā badal rahī hai dil-e-be-qarār kī

miT kar bhī chhuT sakī na zamīñ kū-e-yār kī

qismat to dekhiye mire musht-e-ġhubār kī

baḳhshish kī hai umiid gunahgār bhī liye

had dekhnī hai rahmat-e-parvardigār kī

aañsū ravāñ haiñ gesu-e-mushkīñ khule hue

tasvīr khiñch rahī hai shab-e-intizār kī

sayyād hāl-e-ġhuncha-o-gul tujh se kyā kahūñ

maiñ ne kabhī bhī shakl na dekhī bahār kī

kuchh haañ nahīñ zabān se irshād kījiye

kyoñ aas toḌ dī dil-e-ummīd-vār kī

afsāna ḳhatm ho chukā bīmār-e-hijr kā

ab sub.h ho chukī hai shab-e-intizār kī

aakar qafas meñ kuchh mirī duniyā badal ga.ī

dohrā rahā huuñ ab to kahānī bahār kī

allāh zindagī hai usī zindagī kā naam

jab ham qafas meñ haiñ to ḳhabar hai bahār kī

'raushan' har ek naqsh-e-qadam par jhukī jabīñ

ka.aba se kam nahīñ hai zamīñ kū-e-yār kī

ye mast mast phul ye aamad bahaar ki

duniya badal rahi hai dil-e-be-qarar ki

miT kar bhi chhuT saki na zamin ku-e-yar ki

qismat to dekhiye mere musht-e-ghubar ki

baKHshish ki hai umid gunahgar bhi liye

had dekhni hai rahmat-e-parwardigar ki

aansu rawan hain gesu-e-mushkin khule hue

taswir khinch rahi hai shab-e-intizar ki

sayyaad haal-e-ghuncha-o-gul tujh se kya kahun

main ne kabhi bhi shakl na dekhi bahaar ki

kuchh han nahin zaban se irshad kijiye

kyon aas toD di dil-e-ummid-war ki

afsana KHatm ho chuka bimar-e-hijr ka

ab subh ho chuki hai shab-e-intizar ki

aakar qafas mein kuchh meri duniya badal gai

dohra raha hun ab to kahani bahaar ki

allah zindagi hai usi zindagi ka nam

jab hum qafas mein hain to KHabar hai bahaar ki

'raushan' har ek naqsh-e-qadam par jhuki jabin

kaba se kam nahin hai zamin ku-e-yar ki