ye mat samajh ki chand-sitaron ke sath hun

ye mat samajh ki chāñd-sitāroñ ke saath huuñ

sūraj nahīñ hai baa'd meñ jis ke vo raat huuñ

jo dostī kā farz nibhāne meñ kaT gayā

maiñ ḳhaak par paḌā vo mohabbat kā haat huuñ

ye tere mere biich nahīñ jang āḳhirī

tū bhī abhī hayāt hai maiñ bhī hayāt huuñ

ahbāb mujh ko chhoḌ rahe haiñ to chhoḌ jaa.eñ

maiñ aap apnī zaat meñ ik kā.enāt huuñ

ye log mujh ko zahr banāne pe haiñ musir

varna mizāj se to maiñ āb-e-hayāt huuñ

qatre se bhī huuñ kam ye samundar kā inkisār

qatre ko ye gumāñ ki samundar-sifāt huuñ

'kaifī' maiñ jaise apne buzurgoñ kā huuñ asā

bachchoñ kī bhī kitāb qalam huuñ davāt huuñ

ye mat samajh ki chand-sitaron ke sath hun

suraj nahin hai ba'd mein jis ke wo raat hun

jo dosti ka farz nibhane mein kaT gaya

main KHak par paDa wo mohabbat ka hat hun

ye tere mere bich nahin jang aaKHiri

tu bhi abhi hayat hai main bhi hayat hun

ahbab mujh ko chhoD rahe hain to chhoD jaen

main aap apni zat mein ek kaenat hun

ye log mujh ko zahr banane pe hain musir

warna mizaj se to main aab-e-hayat hun

qatre se bhi hun kam ye samundar ka inkisar

qatre ko ye guman ki samundar-sifat hun

'kaifi' main jaise apne buzurgon ka hun asa

bachchon ki bhi kitab qalam hun dawat hun