ye mere samne shisha laga diya kis ne

ye mere sāmne shīsha lagā diyā kis ne

ye mujh ko aaj mujhī se milā diyā kis ne

vo apne chehre kā DhūñDhe hai daaġh shīshe meñ

hai daaġh chāñd pe us ko batā diyā kis ne

vo jis ke ashkoñ se puurī zamīn giilī hai

havā se pūchho ghaTā ko rulā diyā kis ne

thā qaid dil kā parinda jo un kī āñkhoñ meñ

nazar ye un se milā kar uḌā diyā kis ne

maiñ ek khoTā huuñ sikka parakhne vaalo gar

mujhe bāzār meñ lā kar chalā diyā kis ne

marīz-e-ishq huuñ dīdār merī hasrat hai

vo pūchhte haiñ ke pāgal banā diyā kis ne

kisī kī royā na mayyat pe to kabhī 'āqib'

ye yaad aa.ī hai kis kī rulā diyā kis ne

ye mere samne shisha laga diya kis ne

ye mujh ko aaj mujhi se mila diya kis ne

wo apne chehre ka DhunDhe hai dagh shishe mein

hai dagh chand pe us ko bata diya kis ne

wo jis ke ashkon se puri zamin gili hai

hawa se puchho ghaTa ko rula diya kis ne

tha qaid dil ka parinda jo un ki aankhon mein

nazar ye un se mila kar uDa diya kis ne

main ek khoTa hun sikka parakhne walo gar

mujhe bazar mein la kar chala diya kis ne

mariz-e-ishq hun didar meri hasrat hai

wo puchhte hain ke pagal bana diya kis ne

kisi ki roya na mayyat pe to kabhi 'aqib'

ye yaad aai hai kis ki rula diya kis ne