ye mohabbat ki jawani ka saman hai ki nahin

ye mohabbat kī javānī kā samāñ hai ki nahīñ

ab mire zer-e-qadam kāhkashāñ hai ki nahīñ

dāman-e-rind-e-balā-nosh ko dekh ai saaqī

parcham-e-ḳhvājgī-e-kaun-o-makāñ hai ki nahīñ

muskurāte hue guzre the idhar se kuchh log

aaj pur-nūr guzar-gāh-e-zamāañ hai ki nahīñ

husn hī husn hai gulzār-e-junūñ meñ raqsāñ

ishq kā ālam-e-sad-rañg javāñ hai ki nahīñ

raah par aa hī ga.e aaj bhaTakne vaale

rāhbar dekh vo manzil kā nishāñ hai ki nahīñ

laakh girdāb-o-talātum se guzar kar ai dost

ab safīna mirā sāhil pe ravāñ hai ki nahīñ

tazkire apne har ik bazm meñ haiñ ai 'aḳhtar'

aaj mohmal sī hadīs-e-digarāñ hai ki nahīñ

ye mohabbat ki jawani ka saman hai ki nahin

ab mere zer-e-qadam kahkashan hai ki nahin

daman-e-rind-e-bala-nosh ko dekh ai saqi

parcham-e-KHwajgi-e-kaun-o-makan hai ki nahin

muskuraate hue guzre the idhar se kuchh log

aaj pur-nur guzar-gah-e-zamaan hai ki nahin

husn hi husn hai gulzar-e-junun mein raqsan

ishq ka aalam-e-sad-rang jawan hai ki nahin

rah par aa hi gae aaj bhaTakne wale

rahbar dekh wo manzil ka nishan hai ki nahin

lakh girdab-o-talatum se guzar kar ai dost

ab safina mera sahil pe rawan hai ki nahin

tazkire apne har ek bazm mein hain ai 'aKHtar'

aaj mohmal si hadis-e-digaran hai ki nahin