یہ محبتوں کا جو رشتہ ہے یہ بھی دیکھنے میں عجیب ہے

یہ محبتوں کا جو رشتہ ہے یہ بھی دیکھنے میں عجیب ہے

کہیں میرا دشمن جاں ہے وہ تو کہیں وہ میرا حبیب ہے

وہ جو جان سے بھی عزیز تھا کہیں راستے میں بچھڑ گیا

وہ جو نفرتوں میں شمار تھا وہی آج میرا نصیب ہے

تجھے کیا خبر تری یاد میں میں تڑپ کے روتی ہوں رات دن

تجھے کیا پتہ کہ تو کس قدر مرے جان و دل کے قریب ہے

مری سانس سانس تری مہک مری خواہشوں میں تری کسک

میں تری مریض ہوں مستقل تو مری دوا ہے طبیب ہے

یہ کسک بھی کیسی ہے ہم نفس تجھے اس کسک کی ہے کچھ خبر

تو قریب ہو کے بھی دور ہے کوئی دور ہو کے قریب ہے

میں سمجھ سکی نہ ابھی تلک ترا منشا تیرے مزاج کو

مری زندگی مجھے کیا خبر ترا فلسفہ بھی عجیب ہے

جو اٹھائے پھرتی ہے جا بجا یہ ہے کون نصرتؔ بے نوا

یہ جو اس کے شانوں پہ ہے سجی یہ تو چاہتوں کی صلیب ہے