ye mohabbaton ka jo rishta hai ye bhi dekhne mein ajib hai

ye mohabbatoñ kā jo rishta hai ye bhī dekhne meñ ajiib hai

kahīñ merā dushman-e-jāñ hai vo to kahīñ vo merā habīb hai

vo jo jaan se bhī aziiz thā kahīñ rāste meñ bichhaḌ gayā

vo jo nafratoñ meñ shumār thā vahī aaj merā nasīb hai

tujhe kyā ḳhabar tirī yaad meñ maiñ taḌap ke rotī huuñ rāt-din

tujhe kyā pata ki tū kis qadar mire jān-o-dil ke qarīb hai

mirī saañs saañs tirī mahak mirī ḳhvāhishoñ meñ tirī kasak

maiñ tirī marīz huuñ mustaqil tū mirī davā hai tabīb hai

ye kasak bhī kaisī hai ham-nafas tujhe is kasak kī hai kuchh ḳhabar

tū qarīb ho ke bhī duur hai koī duur ho ke qarīb hai

maiñ samajh sakī na abhī talak tirā manshā tere mizāj ko

mirī zindagī mujhe kyā ḳhabar tirā falsafa bhī ajiib hai

jo uThā.e phirtī hai jā-ba-jā ye hai kaun 'nusrat'-e-be-navā

ye jo us ke shānoñ pe hai sajī ye to chāhatoñ kī salīb hai

ye mohabbaton ka jo rishta hai ye bhi dekhne mein ajib hai

kahin mera dushman-e-jaan hai wo to kahin wo mera habib hai

wo jo jaan se bhi aziz tha kahin raste mein bichhaD gaya

wo jo nafraton mein shumar tha wahi aaj mera nasib hai

tujhe kya KHabar teri yaad mein main taDap ke roti hun raat-din

tujhe kya pata ki tu kis qadar mere jaan-o-dil ke qarib hai

meri sans sans teri mahak meri KHwahishon mein teri kasak

main teri mariz hun mustaqil tu meri dawa hai tabib hai

ye kasak bhi kaisi hai ham-nafas tujhe is kasak ki hai kuchh KHabar

tu qarib ho ke bhi dur hai koi dur ho ke qarib hai

main samajh saki na abhi talak tera mansha tere mizaj ko

meri zindagi mujhe kya KHabar tera falsafa bhi ajib hai

jo uThae phirti hai ja-ba-ja ye hai kaun 'nusrat'-e-be-nawa

ye jo us ke shanon pe hai saji ye to chahaton ki salib hai