ye musht-e-KHak apne ko jahan chahe tahan le ja

ye musht-e-ḳhāk apne ko jahāñ chāhe tahāñ le jā

par is 'ālam ko is 'ālam se mat bār-e-garāñ le jā

'adam se jis tarah tanhā chalā aayā thā phir vaañ ko

munāsib hai isī sūrat se sūrat chhoḌ jaañ le jā

kudūrat mā-sivā kī dho le ḳhātir-ḳhvāh ḳhātir se

ba-juz nām-e-ḳhudā hamrāh mat nām-o-nishāñ le jā

azīz-o-aqribā ne māl-o-milkiyyat ba-kār aave

kisī kī dostī kī ai dilā hasrat na vaañ le jā

gadā.ī bādshāhī bhī masāvī vaqt marne ke

tayaqqun kar suḳhan merī par hargiz mat gumāñ le jā

isī duniyā meñ duniyā se kināra kar jo 'āqil hai

mohabbat phir kisī shai kī na saath ai mehrbāñ le jā

na koī le gayā kuchh aur na le jaave koī hargiz

yaqīñ gor-o-kafan milne pe kyā tashkīk haañ le jā

ga.ī bāġh-e-jahāñ se ḳhalq ḳhālī haath le par tū

bahār-e-zindagī se zikr kā gul be-ḳhizāñ le jā

bakheḌā yaañ kā yaañ par chhoḌ 'afrīdī' 'adam āḳhir

na ye dard-o-balā ranj-o-alam āh-o-fuġhāñ le jā

ye musht-e-KHak apne ko jahan chahe tahan le ja

par is 'alam ko is 'alam se mat bar-e-garan le ja

'adam se jis tarah tanha chala aaya tha phir wan ko

munasib hai isi surat se surat chhoD jaan le ja

kudurat ma-siwa ki dho le KHatir-KHwah KHatir se

ba-juz nam-e-KHuda hamrah mat nam-o-nishan le ja

aziz-o-aqriba ne mal-o-milkiyyat ba-kar aawe

kisi ki dosti ki ai dila hasrat na wan le ja

gadai baadshahi bhi masawi waqt marne ke

tayaqqun kar suKHan meri par hargiz mat guman le ja

isi duniya mein duniya se kinara kar jo 'aqil hai

mohabbat phir kisi shai ki na sath ai mehrban le ja

na koi le gaya kuchh aur na le jawe koi hargiz

yaqin gor-o-kafan milne pe kya tashkik han le ja

gai bagh-e-jahan se KHalq KHali hath le par tu

bahaar-e-zindagi se zikr ka gul be-KHizan le ja

bakheDa yan ka yan par chhoD 'afridi' 'adam aaKHir

na ye dard-o-bala ranj-o-alam aah-o-fughan le ja