ye na puchho tum KHudara ki mera makan kahan hai

ye na pūchho tum ḳhudārā ki mirā makāñ kahāñ hai

jise aag dī hai tum ne vahī merā āshiyāñ hai

tumheñ kyā sunā.ūñ ab maiñ ġham-e-ishq kā fasāna

vahī qissa-e-alam hai vahī ġham kī dāstāñ he

mujhe raushnī milegī rah-e-zīst meñ usī se

tirā naqsh-e-pā hai jānāñ ki charāg-e-kārvāñ hai

mirī har nishāt-o-ġham ko tirī zaat se hai nisbat

tū jo aa.e to bahārāñ tū na aa.e to ḳhizāñ hai

vo bahār-e-sub.h-e-raushan ye añdhere shām-e-ġham ke

vo to un kī thī kahānī ye hamārī dāstāñ hai

vahī zindagī kā lamha ki jo tere saath guzrā

vahī muḳhtasar sā lamha mirī umr-e-jāvedāñ hai

nahīñ kuchh samajh meñ aatā ki 'umīd' ko huā kyā

na hai lab pe harf-e-shikva na zabāñ pe ab fuġhāñ hai

ye na puchho tum KHudara ki mera makan kahan hai

jise aag di hai tum ne wahi mera aashiyan hai

tumhein kya sunaun ab main gham-e-ishq ka fasana

wahi qissa-e-alam hai wahi gham ki dastan he

mujhe raushni milegi rah-e-zist mein usi se

tera naqsh-e-pa hai jaanan ki charag-e-karwan hai

meri har nishat-o-gham ko teri zat se hai nisbat

tu jo aae to bahaaran tu na aae to KHizan hai

wo bahaar-e-subh-e-raushan ye andhere sham-e-gham ke

wo to un ki thi kahani ye hamari dastan hai

wahi zindagi ka lamha ki jo tere sath guzra

wahi muKHtasar sa lamha meri umr-e-jawedan hai

nahin kuchh samajh mein aata ki 'umid' ko hua kya

na hai lab pe harf-e-shikwa na zaban pe ab fughan hai