ye na samjho ki charaghon se nikal jaenge

ye na samjho ki charāġhoñ se nikal jā.eñge

ham ujāle haiñ na.ī sub.h meñ Dhal jā.eñge

yuuñ na baiThā karo fōtpath pe mere yaaro

log guzreñge to pairoñ se kuchal jā.eñge

itnā barham na ho ik aks mukammal kar ke

ham tire ā.ina-ḳhāne se nikal jā.eñge

chāñd ho phuul hoñ yā khilte hue saa.e hoñ

tere dīvāne kisī tarah bahal jā.eñge

ai mirī chashm-e-hazīñ girya-e-paiham mat kar

itnā rone se to patthar bhī pighal jā.eñge

mujh se kyā pūchhte ho ashkoñ kī qīmat kyā hai

ye diye vo haiñ havāoñ meñ bhī jal jā.eñge

itne larzāñ bhī nahīñ shāḳh se TuuTe hue ham

girte girte bhī kahīñ jā ke sañbhal jā.eñge

ye hasīñ lamhe jinheñ thāme hue ho 'ehsān'

ik na ik din tire hāthoñ se phisal jā.eñge

ye na samjho ki charaghon se nikal jaenge

hum ujale hain nai subh mein Dhal jaenge

yun na baiTha karo footpath pe mere yaro

log guzrenge to pairon se kuchal jaenge

itna barham na ho ek aks mukammal kar ke

hum tere aaina-KHane se nikal jaenge

chand ho phul hon ya khilte hue sae hon

tere diwane kisi tarah bahal jaenge

ai meri chashm-e-hazin girya-e-paiham mat kar

itna rone se to patthar bhi pighal jaenge

mujh se kya puchhte ho ashkon ki qimat kya hai

ye diye wo hain hawaon mein bhi jal jaenge

itne larzan bhi nahin shaKH se TuTe hue hum

girte girte bhi kahin ja ke sanbhal jaenge

ye hasin lamhe jinhen thame hue ho 'ehsan'

ek na ek din tere hathon se phisal jaenge