ye na socha tha kabhi pyar mein aisa hoga

ye na sochā thā kabhī pyaar meñ aisā hogā

darmiyāñ bhiiḌ ke bhī koī akelā hogā

vo zamāne meñ koī shaḳhs nirālā hogā

jis ne majbūr ke kirdār ko parkhā hogā

ishq vo ḳhushk zamīñ hai ki jahāñ mīloñ tak

dhuup kā dasht kahīñ ret kā dariyā hogā

ek maidān tasavvur meñ mire hai ki jahāñ

koī dīvār na dīvār kā saaya hogā

kyā mere mulk meñ aisā bhī kabhī hai mumkin

koī mazdūr na lāchār na bhūkā hogā

parashn uThtā hai yahī ba.ad jalāne ke unheñ

kyā charāġhoñ meñ vo pahle sā ujālā hogā

jo bhī aatā hai yahāñ lauT ke jaanā hai use

sab ko dastūr ye duniyā kā nibhānā hogā

aise hālāt kā 'ānand' tasavvur mat kar

jab kisī par bhī kisī ko na bharosā hogā

ye na socha tha kabhi pyar mein aisa hoga

darmiyan bhiD ke bhi koi akela hoga

wo zamane mein koi shaKHs nirala hoga

jis ne majbur ke kirdar ko parkha hoga

ishq wo KHushk zamin hai ki jahan milon tak

dhup ka dasht kahin ret ka dariya hoga

ek maidan tasawwur mein mere hai ki jahan

koi diwar na diwar ka saya hoga

kya mere mulk mein aisa bhi kabhi hai mumkin

koi mazdur na lachaar na bhuka hoga

parashn uThta hai yahi baad jalane ke unhen

kya charaghon mein wo pahle sa ujala hoga

jo bhi aata hai yahan lauT ke jaana hai use

sab ko dastur ye duniya ka nibhana hoga

aise haalat ka 'anand' tasawwur mat kar

jab kisi par bhi kisi ko na bharosa hoga