ye na socha tha kaDi dhup se rishta bhi to hai

ye na sochā thā kaḌī dhuup se rishta bhī to hai

sirf dariyā hī nahīñ raah meñ sahrā bhī to hai

dāstāñ-go kī har ik baat tavajjoh se sunūñ

is hikāyat meñ mire yaar kā qissa bhī to hai

tujh ko chhūne ke liye haath baḌhā.ūñ to lage

phuul ke saath har ik shāḳh meñ kāñTā bhī to hai

ḳhud hī khīñche the hisār us ne magar ab kī baar

mujh se milne vo hadeñ toḌ ke aayā bhī to hai

kashmakash meñ huuñ karūñ tark-e-ta.alluq kaise

us sitamgar pe mire dil ko bharosa bhī to hai

bad-duā ab mire hoñToñ pe machaltī hī nahīñ

isī duniyā meñ mirī chhoTī sī duniyā bhī to hai

ye na socha tha kaDi dhup se rishta bhi to hai

sirf dariya hi nahin rah mein sahra bhi to hai

dastan-go ki har ek baat tawajjoh se sunun

is hikayat mein mere yar ka qissa bhi to hai

tujh ko chhune ke liye hath baDhaun to lage

phul ke sath har ek shaKH mein kanTa bhi to hai

KHud hi khinche the hisar us ne magar ab ki bar

mujh se milne wo haden toD ke aaya bhi to hai

kashmakash mein hun karun tark-e-talluq kaise

us sitamgar pe mere dil ko bharosa bhi to hai

bad-dua ab mere honTon pe machalti hi nahin

isi duniya mein meri chhoTi si duniya bhi to hai