یہ نفس ہمارا دشمن ہے اسے راہ پہ لانا مشکل ہے

یہ نفس ہمارا دشمن ہے اسے راہ پہ لانا مشکل ہے

اوروں کو منانا آساں ہے اس دل کو منانا مشکل ہے

آتا ہے ہمیں بھی اے واعظ تیری ہی طرح تقریر کا فن

باتوں کا بنانا آساں ہے کچھ کر کے دکھانا مشکل ہے

دو لفظ زباں پر آتے ہیں رشتے قائم ہو جاتے ہیں

رشتوں کا بنانا آساں ہے رشتوں کا نبھانا مشکل ہے

مانا کہ سبھی انسان ہی ہیں احساس بھی ہے جذبات بھی ہیں

ہاتھوں کا ملانا آساں ہے پر ساتھ نبھانا مشکل ہے

اسراف کے جو ہیں شیدائی شیطان کے ہوتے ہیں بھائی

پیسوں کا لٹانا آساں ہے پیسوں کا کمانا مشکل ہے

حق بات جسے تم کہتے ہو حق ہے کہ یہی سچائی ہے

پر یہ بھی حقیقت ہے یارو مانے گا زمانہ مشکل ہے

انسان کے ہاتھوں میں جاذب تعمیر بھی ہے تخریب بھی ہے

سو شمعیں بجھانا آساں ہے اک شمع جلانا مشکل ہے