ye nahin gham ki main paband-e-gham-e-dauran thi

ye nahīñ ġham ki maiñ pāband-e-ġham-e-daurāñ thī

rañj ye hai ki mirī zaat mirā zindāñ thī

sub.h se aa.ina chhūte hue Dar lagtā hai

raat hī ḳhvāb meñ dekhā thā ki maañg afshāñ thī

sūkhtī jaatī hai ab Dhaltī huī umr ke saath

baaḌh mehñdī kī jo darvāze pe apne haañ thī

sham.eñ aur saa.e se dekhe ga.e tūfān kī raat

us havelī meñ jo muddat se bahut vīrāñ thī

ḳhaak meñ khel ke sab nashv-o-numā paa.ī hai

bint-e-iflās huuñ maiñ bhuuk to merī maañ thī

paḌh rahā thā vo kisī aur ke āñchal pe namāz

maiñ bas ā.īna-o-qur.ān liye hairāñ thī

ye nahin gham ki main paband-e-gham-e-dauran thi

ranj ye hai ki meri zat mera zindan thi

subh se aaina chhute hue Dar lagta hai

raat hi KHwab mein dekha tha ki mang afshan thi

sukhti jati hai ab Dhalti hui umr ke sath

baDh mehndi ki jo darwaze pe apne han thi

shamen aur sae se dekhe gae tufan ki raat

us haweli mein jo muddat se bahut viran thi

KHak mein khel ke sab nashw-o-numa pai hai

bint-e-iflas hun main bhuk to meri man thi

paDh raha tha wo kisi aur ke aanchal pe namaz

main bas aaina-o-quran liye hairan thi